𝗖𝗛𝗜𝗭 𝗣𝗥𝗢𝗣𝗢𝗦𝗘𝗦 𝟱-𝗬𝗘𝗔𝗥 𝗧𝗘𝗥𝗠 𝗙𝗢𝗥 𝗕𝗔𝗥𝗔𝗡𝗚𝗔𝗬, 𝗦𝗞 𝗟𝗘𝗔𝗗𝗘𝗥𝗦

Maaaring mas humaba ang termino ng mga barangay at Sangguniang Kabataan (SK) officials kung maisasabatas ang panukala ni Sen. Francis “Chiz” Escudero.

Sa Senate Bill No. 2387, iminungkahi ni Escudero na gawing limang taon mula sa kasalukuyang apat na taon ang termino ng mga barangay at SK officials. Kapag naging batas, itatakda naman sa Nobyembre 2028 ang susunod na barangay at SK elections.

𝗕𝗮𝗸𝗶𝘁 𝗶𝘁𝗼 𝗶𝗻𝗶𝗽𝗿𝗼𝗽𝗼𝘀𝗲?

Ayon kay Escudero, mas mahabang termino ang maaaring magbigay sa mga lokal na opisyal ng sapat na panahon upang maipatupad at makumpleto ang mga programa at proyekto ng kanilang barangay.

Madalas umanong naaantala ang mga proyekto kapag napuputol ang kanilang implementation dahil sa pagbabago ng mga opisyal. Sa limang taong termino, layunin ng panukala na magkaroon ng mas maayos na continuity, mas matatag na local planning, at mas kaunting administrative disruptions.

𝗣𝗮𝗻𝗴𝗮𝗻𝗴𝗮𝗹𝗮𝗴𝗮 𝗯𝗮 𝗻𝗴 𝟱-𝘆𝗲𝗮𝗿 𝘁𝗲𝗿𝗺 𝗮𝗻𝗴 𝘁𝗵𝗶𝗿𝗱-𝘁𝗲𝗿𝗺 𝗼𝗳𝗳𝗶𝗰𝗶𝗮𝗹𝘀?

Hindi awtomatikong nangangahulugan ang panukala na puwede silang tumakbo muli.

Nanatili ang kasalukuyang term-limit rules: hanggang tatlong magkakasunod na termino para sa barangay officials, habang isang termino lamang para sa SK officials. Dahil dito, ang mga barangay official na nasa kanilang ikatlong consecutive term ay hindi na maaaring kumandidato muli sa 2028 elections.

Sa madaling salita, ang pangunahing layunin ng panukala ay bigyan ng mas mahabang panahon ang barangay at SK officials para matapos at maipagpatuloy ang kanilang mga programa, habang pinananatili ang umiiral na limitasyon sa bilang ng kanilang termino.

Sa ngayon, panukala pa lamang ang Senate Bill No. 2387 at kailangan pa itong dumaan sa proseso ng Senado at Kamara bago ito maging batas.