5 year term ng Barangay, SK Officials, isinabatas na

Nilagdaan na ni Pangulong Ferdinand “Bongbong” Marcos Jr. ang Republic Act No. 12326, na nagtatakda ng limang taong termino para sa mga opisyal ng barangay at Sangguniang Kabataan (SK) at naglilipat sa Barangay at Sangguniang Kabataan Elections (BSKE) sa Nobyembre 2028.

Ayon kay Senator Chiz Escudero, ang bagong batas ay naglalayong magbigay ng higit na katiyakan at katatagan sa pamamahala sa barangay, na nagsisilbing pangunahing frontliner ng pamahalaan sa paghahatid ng mga serbisyo publiko sa mga komunidad.

Bilang pangunahing may-akda ng panukala sa Senado, sinabi ni Escudero na layunin ng batas na maayos ang sistema at magkaroon ng malinaw at regular na siklo ng pamamahala sa mga barangay.

“Kapag maayos ang termino, maayos din ang serbisyo,” ani Escudero.

Nagpasalamat din ang senador kay Pangulong Marcos sa agarang pagsasabatas ng RA No. 12326, gayundin sa mga kasamahan niya sa Senado at mga mambabatas sa House of Representatives sa kanilang suporta at pakikiisa sa pagpasa ng nasabing reporma.

Ayon kay Escudero, inaasahang makatutulong ang batas upang maisulong ang mas matatag, mas episyente, at mas maayos na pamamahala sa mga barangay.