𝗕𝗔𝗞𝗜𝗧 𝗠𝗔𝗛𝗔𝗟𝗔𝗚𝗔 𝗔𝗡𝗚 𝗦𝗣𝗢𝗥𝗧𝗦 𝗦𝗔 𝗖𝗔𝗕𝗨𝗬𝗔𝗢?

𝙏𝙖𝙢𝙥𝙤𝙠 𝙨𝙖 𝙋𝙖𝙜𝙙𝙞𝙧𝙞𝙬𝙖𝙣𝙜 𝙣𝙜 𝙄𝙠𝙖-14 𝙣𝙖 𝘾𝙞𝙩𝙮𝙝𝙤𝙤𝙙 𝘼𝙣𝙣𝙞𝙫𝙚𝙧𝙨𝙖𝙧𝙮 𝙣𝙜 𝘾𝙖𝙗𝙪𝙮𝙖𝙤 𝙖𝙣𝙜 𝙡𝙖𝙮𝙪𝙣𝙞𝙣𝙜 𝙥𝙖𝙡𝙖𝙠𝙖𝙨𝙞𝙣 𝙖𝙣𝙜 𝙖𝙠𝙩𝙞𝙗𝙤𝙣𝙜 𝙥𝙖𝙢𝙪𝙢𝙪𝙝𝙖𝙮 𝙣𝙜 𝙢𝙜𝙖 𝙢𝙖𝙢𝙖𝙢𝙖𝙮𝙖𝙣

Sa pagdiriwang ng ika-14 na Cityhood Anniversary ng Cabuyao, isa sa mga pangunahing prayoridad ng Pamahalaang Lungsod ang pagsusulong ng sports at aktibong pamumuhay upang maging mas malusog, masigla, at mas matatag ang bawat Cabuyeño.

Ayon kay Cabuyao City Mayor Dennis “Denha” Hain, mahalagang bahagi ng pag-unlad ng komunidad ang pagbibigay ng mga programa at aktibidad sa sports dahil hindi lamang nito pinapalakas ang pangangatawan, kundi nagsisilbi rin itong epektibong stress reliever at paraan upang mapanatili ang mabuting kalusugan at positibong pamumuhay ng mga mamamayan.

Samantala, sinabi ni Chief in New Governance Richard “Dondon” Hain na libre para sa publiko ang mga pasilidad na inilaan ng Pamahalaang Lungsod para sa iba’t ibang gawaing pampalakasan. Kabilang dito ang Cabuyao Athletes Basic School (CABS), na dinarayo na ng maraming Cabuyeño para sa jogging at biking. Bukas na rin sa publiko ang mga pasilidad para sa badminton at pickleball, na nagbibigay ng mas maraming pagkakataon sa mga residente na makilahok sa iba’t ibang uri ng sports.

Ayon kay Hain, layunin ng lokal na pamahalaan na mailapit ang de-kalidad na sports facilities sa mga mamamayan upang hindi na nila kailangang bumiyahe o gumastos pa sa ibang lugar para lamang makapag-ehersisyo. Aniya, sa pamamagitan ng mga libreng pasilidad na ito, hinihikayat ang bawat Cabuyeño na gawing bahagi ng kanilang pang-araw-araw na pamumuhay ang regular na ehersisyo bilang paraan ng pagpapanatili ng mabuting kalusugan at pag-iwas sa iba’t ibang sakit.

Sa pamamagitan ng patuloy na pagpapalawak ng mga programang pangkalusugan at pampalakasan, isinusulong ng Pamahalaang Lungsod ng Cabuyao ang isang komunidad na mas aktibo, mas malusog, at mas handa sa mga hamon ng hinaharap.