Siklista ng Cabuyao nakiisa sa 14th Cityhood Anniversary Bike Fun Ride ng lungsod

Maagang nagtipon ang mga siklista mula sa iba’t ibang bike clubs at cycling enthusiasts upang makiisa sa 14th Cityhood Anniversary Bike Fun Ride bilang bahagi ng pagdiriwang ng ika-14 na anibersaryo ng pagiging lungsod ng Cabuyao.

Dinaluhan ang aktibidad ng mga kalahok mula sa iba’t ibang edad, kabilang ang mga kabataan at beteranong siklista, na sama-samang nagpedal sa mga pangunahing lansangan ng lungsod bilang pagpapakita ng suporta sa pagsusulong ng malusog na pamumuhay at aktibong transportasyon.

Ayon kay Cabuyao City Mayor Dennis Hain, layunin ng bike fun ride na hikayatin ang publiko na isulong ang pagbibisikleta bilang isang ligtas, malusog at masayang  alternatibong paraan ng transportasyon. Binigyang-diin din ang kahalagahan nito sa pagtugon sa tumataas na pangangailangan sa enerhiya at pagsusulong ng mas napapanatiling paraan ng paglalakbay.

Bukod sa pagtataguyod ng kalusugan at kaligtasan, nagsilbi rin ang aktibidad bilang pagkakataon upang higit pang mapalakas ang pagkakaisa ng komunidad at pakikilahok ng mga mamamayan sa pagdiriwang ng Cityhood Anniversary ng Cabuyao.