𝗕𝗜, 𝗜𝗦𝗜𝗡𝗨𝗦𝗨𝗟𝗢𝗡𝗚 𝗔𝗡𝗚 𝗔𝗜-𝗣𝗢𝗪𝗘𝗥𝗘𝗗 𝗕𝗢𝗥𝗗𝗘𝗥 𝗦𝗘𝗖𝗨𝗥𝗜𝗧𝗬 𝗦𝗬𝗦𝗧𝗘𝗠 𝗦𝗔 𝗠𝗚𝗔 𝗣𝗔𝗡𝗚𝗨𝗡𝗔𝗛𝗜𝗡𝗚 𝗚𝗔𝗧𝗘𝗪𝗔𝗬 𝗡𝗚 𝗣𝗜𝗟𝗜𝗣𝗜𝗡𝗔𝗦

Iginiit ng Bureau of Immigration (BI) ang pangangailangan ng isang ganap na integrated at nationwide border security system na gumagamit ng artificial intelligence (AI), biometrics, at real-time data processing upang mas epektibong matukoy at mahadlangan ang mga human traffickers, terorista, at iba pang kriminal bago pa man makapasok sa bansa.

Ayon kay BI spokesperson Dana Sandoval, ang panukalang Civil Aviation and Immigration Security Services (CAISS) project ay magbibigay ng end-to-end border security system nang walang direktang gastusin sa pamahalaan.

Sinabi ni Sandoval na ang P10.74-bilyong unsolicited Public-Private Partnership (PPP) proposal ay hindi lamang nakatuon sa Ninoy Aquino International Airport (NAIA) kundi sasaklaw sa lahat ng pangunahing international gateways ng bansa.

Kabilang sa proyekto ang 11 international airports, isang international seaport sa Zamboanga, at anim na border crossing stations. Magkakaroon ang mga ito ng electronic gates, data processing systems, AI processing, at biometric capturing capabilities.

Ayon sa BI, magagamit din ang sistema sa mas epektibong pag-monitor ng mga pasahero sa pamamagitan ng data sorting at pagtatakda ng mga parameters para sa target approach sa pagtukoy ng mga indibidwal na maaaring may kinalaman sa kriminalidad.

Binanggit din ni Sandoval na may nakapaloob na four-year technology refresh cycle ang proyekto upang matiyak na gumagamit ang BI ng pinakabagong teknolohiya nang walang dagdag na pasanin sa gobyerno.

Aniya, ang financing scheme ng proyekto ay nakabatay sa user-pay system kung saan ang mga gagamit lamang ng serbisyo ang magbabayad, habang ang mga hindi gumagamit nito ay hindi maaapektuhan sa pananalapi.

Sumailalim na rin sa Swiss challenge ang proyekto, kung saan binigyan ng pagkakataon ang ibang kumpanya na magsumite ng mas mahusay o mas murang alok. Gayunman, ayon sa BI, walang ibang kumpanya ang nagsumite ng counter-offer.

Sa kasalukuyan, nasa ilalim pa rin ng pagsusuri ng Department of Finance, Department of Justice, at Office of the Solicitor General ang panukala. Nilinaw ng BI na wala pang napipirmahang kontrata at wala pang sinisingil na anumang bayarin kaugnay ng proyekto.

Sakaling maaprubahan, sasaklawin ng CAISS ang mga paliparan sa NAIA, Clark, Davao, Mactan-Cebu, Boracay, Iloilo, Kalibo, Laoag, Bohol-Panglao, Puerto Princesa, at Zamboanga, gayundin ang Zamboanga seaport at anim na border crossing stations.

Ang sistema ay sumusunod sa mga pamantayan ng International Civil Aviation Organization (ICAO) para sa biometric at border security systems at magtatampok ng advanced passenger information systems, automated border control na may contactless face pass, biometric kiosks, criminal record search engines, at deception detection tools.

Binigyang-diin ng BI na nananatili pa ring proposal mula sa isang pribadong kumpanya ang CAISS at patuloy pang sumasailalim sa assessment bago pinal na pagdesisyunan ng pamahalaan.